Şabran rayon ümumtəhsil məktəblərinin müəllimləri arasında “Heydər Əliyev İli” çərçivəsində keçirilən “Xəmsə” milli intellektual oyununun finalı baş tutub.
İntellektual oyunda 12 məktəb komandası (şəhər 1, 2, 3, 4 nömrəli, Ağbaş, Ağalıq, Uzunboyad, Pirəbədil, Aygünlü kənd tam orta, 2 nömrəli, Çayqaraqaşlı, Xəlfələr kənd ümumi orta məktəblərinin komandaları) mübarizə aparıb.
Hər oyununda 4 komandanın mübarizə apardığı yarışmanın finalına ən yüksək xallı 4 komanda vəsiqə qazanıb. Final oyununda şəhər 1, 2, 3 nömrəli və Ağbaş kənd tam orta məktəbinin müəllimləri qalibiyyət uğrunda yarışıb. Oyunun nəticələrinə əsasən P. İdrisov adına Ağbaş kənd tam orta məktəbinin komandası I, S. Zülfüqarov adına 3 nömrəli tam orta məktəbin komandası II, R. Yusifov adına 2 nömrəli texniki təmayüllü tam orta məktəb-liseyin komandası III yerə çıxıb.
Qalib komandalar Şabran rayon Gənclər və İdman İdarəsinin təşəkkürnaməsi, ATİAHİ-nin Şabran rayon komitəsinin fəxri fərman və hədiyyələri ilə təltif olunublar.
Qeyd edək ki, yarışma Quba-Xaçmaz Regional Təhsil İdarəsinin Şabran rayonu üzrə təhsil sektoru, Şabran rayon Gənclər və İdman İdarəsi və ATİAHİ Şabran rayon komitəsinin birgə təşkilatçılığı ilə keçirilib.